探索馬灣

講咗成個幾兩個月話要去馬灣公園，但都未成行，終於，我地下定決心，喺星期日約埋ToTo一齊，去馬灣探索一下。我地一行四人早堂之後出發，早餐都唔食（諗住去到馬灣先食），就坐車落荃灣碼頭，然後再坐船去珀麗灣，去到珀麗灣十一點都未到，但真係估唔到珀麗灣有咁多人，我地等咗成半個鐘先有位坐，食完早餐十二點左右，跟住就開始我地嘅馬灣公園之旅。

原來由碼頭過去公園都幾遠吓，最初諾諾係自己行，後來我地驚行咁耐會用晒佢D電，所以就決定抱起佢行（當然係由諾諾爸爸負責），行咗大約二十分鐘，終於去到我地嘅目的地。

入到公園，最初以為唔似好大，但後來行吓行吓，發覺原來佢都唔細，我地邊行邊玩咁玩咗一個鐘，都未行晒成個公園，不過，因為到咗諾諾嘅瞓晏覺嘅時間，所以我地就算未行完都要走，唯有下次先再嚟探索過啦。（最後，我地好休閒咁坐咗個幾鐘，坐到諾諾瞓醒先搭巴士出返去）

出發喇



















又執樹葉



















花花走廊













當然唔少得吹波波啦













兩父子













馬灣公園














要休息番一陣

爸爸返工啦

自從諾諾返學之後，成日都好似唔係咁開心，每日瞓醒時都會問吓今日使唔使返學，感覺上好似好大壓力，而平時嘅生活亦有受到影響。

以前，當我地叫諾諾唔好做一D壞事嘅時候，佢好多時都會比較聽話，但而家我每次叫唔好或者話佢嘅時候，佢就會講：你走／爸爸返工啦／上天花板，總之就叫我離開佢遠D，有時又會打我，令到我不知幾傷心，簡直有想喊嘅感覺。

不過，諾諾今個星期因為有少少傷風，所以成個星期只係返咗兩日學，咁嘅情況之下，佢嘅情緒又好似好返好多，又變返以前嘅諾諾，唔通佢真係咁唔鍾意返學？

新衫幾靚（爸爸揀嘅）

四眼仔（返學整嫁）

媽媽買俾我

向返學Say No

初初返學嘅時候，諾諾都返得幾開心，而且表現都唔錯，但係唔知點解，由上星期一開始，諾諾突然間唔鍾意返學。喺星期一返學時，都係同平時一樣，梳洗完，食埋早餐，跟住就換衫返學，一切都好順利，但係返學返到十一點左右，范老師就打電話俾婆婆，話諾諾喊得好利害，要搵婆婆，最後，婆婆唯有落去湊返諾諾返屋企。

最初諗住都唔係太大問題，可能係之前一晚比較夜瞓（去咗吉野家打邊爐），所以我地星期一晚就俾佢早少少瞓，估第二朝應該無問題掛。點知到第二日，諾諾起咗身之後就話唔想返學，婆婆話要同佢梳洗換衫返學，佢就開始扭計同大喊，最後都搞佢唔掂，終於俾佢成功爭取到唔返學一日。到咗夜晚，我地成家人一齊賽後檢討，決定聽日無論如何，都要帶佢返學（對諾諾威迫利誘，但相信都要辛苦婆婆了，而媽媽亦同老師講話無論諾諾點扭計同喊，都唔可以俾佢早走）。

到咗星期三，情況都係一樣，諾諾一起身就喊住話唔返學，當然，最後都夾硬帶咗佢返學，去到學校門口又喊，婆婆將佢交咗俾老師之後，搞咗一陣先走得，原來諾諾人捉咗去見校長，見完校長之後就冇喊喇（仲有禮物收）。之後星期四同星期五情況都係差唔多，不過就係婆婆送到去學校門口由校長抱佢入去。

終於捱過咗黑暗嘅一星期（其實成個禮拜諾諾都好扭計，又好容易大喊，喊到把聲沙晒），到咗星期六日又好開心咁四圍去玩，佢又做返以前嘅諾諾。好快，又到星期一，我地又擔心諾諾會出事，不過今次佢好叻冇喊到，只係講話唔想返學，但我地要佢返佢都冇扭計，都算係一個好大嘅進步，而星期二情況更好，希望諾諾可以快D鍾意番返學啦！（但係我同媽媽都要研究吓，睇吓係咪間學校唔適合諾諾，而令到佢唔鍾意返學呢？希望可以快D搵到答案）

星期日完咗早堂後，同正正一家、賣魚、Miss Chan同CoCo，一齊出發去城門水塘散步，其實都冇乜特別嘢做，都係四圍走走同吹波波，不過諾諾同正正都已經玩得好開心。