向返學Say No

初初返學嘅時候，諾諾都返得幾開心，而且表現都唔錯，但係唔知點解，由上星期一開始，諾諾突然間唔鍾意返學。喺星期一返學時，都係同平時一樣，梳洗完，食埋早餐，跟住就換衫返學，一切都好順利，但係返學返到十一點左右，范老師就打電話俾婆婆，話諾諾喊得好利害，要搵婆婆，最後，婆婆唯有落去湊返諾諾返屋企。

最初諗住都唔係太大問題，可能係之前一晚比較夜瞓（去咗吉野家打邊爐），所以我地星期一晚就俾佢早少少瞓，估第二朝應該無問題掛。點知到第二日，諾諾起咗身之後就話唔想返學，婆婆話要同佢梳洗換衫返學，佢就開始扭計同大喊，最後都搞佢唔掂，終於俾佢成功爭取到唔返學一日。到咗夜晚，我地成家人一齊賽後檢討，決定聽日無論如何，都要帶佢返學（對諾諾威迫利誘，但相信都要辛苦婆婆了，而媽媽亦同老師講話無論諾諾點扭計同喊，都唔可以俾佢早走）。

到咗星期三，情況都係一樣，諾諾一起身就喊住話唔返學，當然，最後都夾硬帶咗佢返學，去到學校門口又喊，婆婆將佢交咗俾老師之後，搞咗一陣先走得，原來諾諾人捉咗去見校長，見完校長之後就冇喊喇（仲有禮物收）。之後星期四同星期五情況都係差唔多，不過就係婆婆送到去學校門口由校長抱佢入去。

終於捱過咗黑暗嘅一星期（其實成個禮拜諾諾都好扭計，又好容易大喊，喊到把聲沙晒），到咗星期六日又好開心咁四圍去玩，佢又做返以前嘅諾諾。好快，又到星期一，我地又擔心諾諾會出事，不過今次佢好叻冇喊到，只係講話唔想返學，但我地要佢返佢都冇扭計，都算係一個好大嘅進步，而星期二情況更好，希望諾諾可以快D鍾意番返學啦！（但係我同媽媽都要研究吓，睇吓係咪間學校唔適合諾諾，而令到佢唔鍾意返學呢？希望可以快D搵到答案）

星期日完咗早堂後，同正正一家、賣魚、Miss Chan同CoCo，一齊出發去城門水塘散步，其實都冇乜特別嘢做，都係四圍走走同吹波波，不過諾諾同正正都已經玩得好開心。