元朗半日遊

星期日入了元朗，主要是為賣魚慶祝生日，而食晚飯之前，我地安排了一些活動同諾諾玩，就是去了元朗公園玩，估唔到個公園都幾好，有一大片草地，諾諾同我地都玩得好開心（仲有好攰同好熱），只可惜今次正正因為病咗，所以冇出到嚟，希望下次去可以同正正一齊去玩啦。

之後我地就去了大榮華食晚飯，可能因為大家都好耐冇試過食咁多高膽固醇高脂肪嘅野食，所以大家都食得好痛快、好盡情（包括諾諾，佢都好鍾意食豬油撈飯），大家亦過了開心的一晚（還要多謝賣魚載我地返屋企）。

放飛碟



















終放夠膽玩搖搖板













放氣都好玩

真係……

有諾諾喺度，的確為我地帶來唔少嘅歡樂，連食晚都食得特別開心

對話一：
婆婆，你煮Lei啲野食真係好好味， Very Good（樹起拇指）-- 婆婆聽到之後開心到不得了

對話二：
《美女廚房》啲人真係好論盡，‘Sir’晒啲魚落地下（做埋動作）

K歌之王

星期日同D團友去唱K慶祝敏儀生日，爸爸已經好幾年冇去過，諾諾更加係第一次，之前都擔心諾諾會唔鍾意咁黑同嘈嘅環境，但係估唔到，佢竟然會爭住唱，話聽日再唱過。

一齊唱兩隻老虎













冇音樂都照唱



















最鍾意唱Soler D歌（吹呀吹呀吹呀 - 風的季節 + 咀香園）

鼓壇狙擊手

從片中看到，諾諾對音樂的熱誠有多大
（23/5到了賣魚屋企玩）

http://www.youtube.com/watch?v=bLxvpRkO14A

生活點滴

白雪公主
近來諾諾每朝都很早起身，有時甚至早過媽媽（六點半前），而起身之後就會走過來我地房叫我地起身陪他玩。琴日，他照樣六點幾七點左右起身，之後就叫我陪他玩，對白如下：
諾：爸爸，你起身陪我玩啦
爸：你陪爸爸瞓多一陣好唔好呀
諾：唔好啦
爸：但係爸爸好眼瞓想瞓多一陣喎（合埋眼扮瞓覺）
諾：你起身陪我玩啦
（跟住佢就錫我一啖）
諾：你起身啦
爸：我係白雪公主?
諾：係呀
爸：咁你就係王子?
諾：係呀
之後就只有起身陪佢玩（啱啱琴晚同佢講完白雪公主嘅故事）

超級無敵乒乓波（豬豬vs奧巴馬）
自從今年新年團拜之後，諾諾成日都叫我地陪佢打乒乓波（要講XX糕，而XX可以係任何一樣野，包括人、物件、食物等），有一球到我打嘅時候，我就話豬豬糕（諾諾會攬住隻豬豬瞓覺），講完之後，佢就即刻嘟住咀同我講：
諾：唔好啦，我好鍾意豬豬嫁
爸：玩吓之嘛
諾：我好鍾意豬豬嫁（繼續嘟咀）
爸：好啦好啦，我講過第二個啦
（幾輪之後）
爸：奧巴馬糕
諾：奧巴馬好慘呀，哈哈……！（大笑）
喺諾諾嘅心目中，奧巴馬同豬豬嘅地位真係相差得太遠了。

十分勞動的勞動節

在勞動節的假期，我地一家同團友仔參加了兩天的生活營。

第一天去了東部華僑城，這個地方的確很不錯，消磨了我地一個下午，還影了很多相（差點打爆了記憶咭），到了晚上就回到酒店食自助餐，不過質素就一般，到晚上媽媽想去腳底按摩，但最後就變成弟兄姊妹分享的時間。

第二天，到差不多十一時才出發，去了油畫村，也去了幾個推銷及買手信的地方，而我同媽媽都買了一些手信回港（買了牛耳及芝麻餅，原來牛耳都係諾諾的"飛佛"）。

很快很快，就到了回程的時間，只是短短的兩日時間，卻用了爸爸媽媽四日的體力，而今次的旅程，多得有弟兄姊妹的照顧同體諒（特別係正正，諾諾同正正一齊時會玩得特別起勁），令到我地可以度過一個愉快的假期。

唔鍾意影相



















同媽媽鬥快



















好兄弟



















咁神氣

牙齒痛

復活節假期期間，不知是否因經常外出食飯及無湯水飲，令到諾諾有些熱氣，仲成日話牙齒痛（講了兩日）。

後來發現，原來諾諾所講的牙齒痛是生痱滋（是諾諾的第一次），我地知道後，便到屋企樓下的藥房買了一枝藥膏，搽了之後，到第二日情況好似好了很多，再無話牙齒痛，估唔到枝藥膏又幾使得。