少男的祈禱

今次好想將呢件事記低，唯有勞煩Tony幫手。

今晚Tony夜返，我食完飯之後突然好肚痛，我就同諾諾講聲，然後入咗厠所。過咗大約五分鐘，諾諾就不停敲門，同我講：「媽媽，係咪好痛呀？」「媽媽，你出嚟未呀？」「媽媽，你食唔食丹丹呀？」我聽到都覺得好好笑。跟住我就快快趣趣走返出嚟，我一出到嚟，諾諾竟然即刻衝埋嚟「呵」我個肚！

後來同諾諾入房瞓，佢瞓喺我側邊，佢又再問我：「媽媽，仲有冇肚痛呀？」
我話：「有呀！」
佢話：「希望媽媽唔好肚痛啦！」
我話：「咁你話俾天父知啦！」（我本來想佢明白祈禱嘅道理）
佢諗咗一陣，就講：「天父，俾諾諾媽媽唔好肚痛啦，阿們」
Oh，我好開心，說：「你幫媽媽祈禱呀？」
佢話：「係呀！」
我話：「多謝你呀！」

但他已經閉上眼瞓着咗嘞，而我嘅眼淚就忍唔住流咗出嚟……

吃喝玩樂馬鞍山

上星期一，我地終於帶咗諾諾返馬鞍山住幾日，試吓三個人嘅生活（ToTo都有一日嚟咗體驗生活）。喺三日兩夜嘅時間裏面，諾諾都表現得唔錯，連我地最擔心佢夜晚瞓覺要搵婆婆嘅情況都無發生，所以我覺得諾諾嘅適應能力都算幾好。

對於諾諾嚟講，馬鞍山嘅環境比較新鮮，但住到第二三日，唔知係咪見唔到婆婆／D朋友仔嘅關係，我地覺得佢好似有少少悶，不過好在情況都唔算嚴重。到後來我地問佢返馬鞍山開唔開心，佢都話開心（通常佢都係答開心），咁我地都無咁擔心。

喺今日至星期三，我地會再入馬鞍山體驗生活，唔知今次諾諾又會有嘜野反應呢？（遲吓再update大家）

帶頭盔揸電單車




















奧運熱潮（又係ToTo送嘅）

齊齊去旅行

終於都整理完去北海道D相，總共影咗七百幾張相，話多唔多，但亦唔算少，最後揀咗百六張出嚟，大家有時間可以去我個相簿睇睇：

http://good-times.webshots.com/album/564888007cScZHl?vhost=good-times

總括成個行程，都算玩得好開心愉快，諾諾搭咁耐飛機都冇事，行程又順利，係有少少落雨同諾諾有時都會扭計，整體都唔錯唔錯。

講開諾諾扭計，佢成日都話唔要邊個唔要邊個，有時又出手打人，想抱佢嘅時候就要落地，想佢落地行又話要抱（佢要抱嘅時間多，所以都幾辛苦），總之就唔多聽話，所以旅途中都令到大家有少少唔開心。不過最重要，都係旅程平安順利，而諾諾又玩得開心，咁都叫好理想喇。

以前都有同諾諾一齊睇飛機，但而家佢見到飛機好似肉緊咗好多，唔知係咪因為親身經歷過搭飛機嘅感覺，所以特別有親切感呢？希望可以好快再有機會同諾諾一齊去旅行搭飛機啦！