傾心事 (20/8/10)

今早媽媽要返工，諾諾起身時媽媽已出了門口，當他發現媽媽不在時，便從睡房出來找我，哭著說好掛住媽媽，好想同媽媽玩，哭了一會心情才能平服。過了一會，他說想我陪他一起入房，入到房後，又叫我坐在地台的樓梯上，之後便跟我說想和我傾傾頭先唔開心的事，對話如下：

諾：爸爸，我想傾吓頭先唔開心
爸：好呀，你講啦，我會留心聴
諾：我唔講
爸：你唔講？咁你係咪想爸爸講呀？
諾：（點頭）
爸：你係咪好掛住媽媽，好想同媽媽玩，所以唔開心呀？
諾：（點頭，然後趴在我大腿上）
（開解咗一陣 - 如媽媽好快就返嚟／媽媽知道你唔開心佢都會唔開心等）
爸：好啦，唔開心多一分鐘好喇
諾：（又點頭）
（過咗廿秒唔夠）
諾：爸爸，過咗一分鐘未呀
爸：（咁快就冇事！）過咗喇，咁唔好唔開心喇喎，我地出番去啦

媽媽話，原來近來當諾諾唔開心時，都會入房坐在梯級上，要等到心情平服了才出來（好似好大個咁）。不知當諾諾長大之後，還會不會叫我入房傾心事，我也希望可以成為他的傾訴對象？