第一次……

在今個週末，諾諾過了非常充實的兩天，還做了一些新的嚐試。

睇戲 + 科學館

我地怕諾諾不能坐太耐及會嘈住別人，所以一直諗住要等他大個少少才帶他入戲院睇戲，不過可能賣魚比較大膽，他夠膽約諾諾（還有媽媽及ToTo）星期六去睇冰河世紀3。整個睇戲的過程，係除了開頭因坐位問題有些少混亂外，都算順利，而諾諾就對戲裏面的恐龍有些少恐懼，最後更驚到瞓著覺（睇了一半左右）。不過媽媽話，今次係一個好好的經歷，而睇戲時諾諾的表現都好好，問問題時又會細細聲，所以，媽媽都好開心。到走的時候，諾諾仲同媽媽講要睇Keroro。（唯一的遺憾是爸爸要返工冇得去）

睇完戲之後，我地（爸爸放了工）再去了科學館玩。今次亦是諾諾第一次到科學館，這裏的所有東西對諾諾來說都很新鮮，每樣野都要去摩一摩、試一試，玩了很久才捨得離開。科學館確實是一個十分不錯的地方，相信我地會更多來到科學館參觀（應該是玩）。

廸士尼

之前帶過諾諾去廸士尼玩，令到諾諾對她有些少抗拒，每次問他去唔去廸士尼，他都話唔去，但自從電視出了史廸仔個廣告之後，他好像對廸士尼的印象改觀了（廣告的威力真大），變得非常正面。星期日，正正一家相約了諾諾到廸士尼玩。在早上九時左右，正正一家到了我地樓下的酒樓，同我地一齊飲茶（順便接諾諾），到十點四五左右，他們便開始廸士尼的旅程。當諾諾上了白兔車的時候，他顯得有些不開心，我同媽媽看見了都有些擔心。後來敏儀匯報，諾諾的情況很好，我地才放心。其實，最初只是諗住玩一至兩個鐘，但最後卻玩了成五個鐘，連晏覺都唔使瞓，可想而知他們（相信主要係正正同諾諾）有幾咁樂而忘返，到回程的時候，正正同諾諾上了車唔夠十秒就火速瞓著覺。當他回家瞓醒後，仍表現得十分雀躍，跳來跳去，相信是他真的玩得非常非常之開心。今次真的辛苦了正正爸爸同正正媽媽，當然還要多謝他們，不過，我還是希望他們可以帶諾諾去廸士尼多玩幾次。