先後次序

原來諾諾食藥都有先後次序，上次睇完醫生，醫生開咗五樽藥水俾佢，佢每次食藥嘅時候，都會要求食咗四樽好味D嘅藥先，到最後先至食最唔鐘意嗰樽（佢話有少少苦），相信諾諾都係一個有要求嘅人。

自從病完之後，諾諾嘅心情好似唔多好，成日喊同扭計，搞到我地都唔係咁開心，情況就好似佢初初返學咁，唔知今次幾時先可以回復正常。

第一樽就係有少少苦嗰樽（應該係咳水）

倒水

星期五晚，諾諾瞓瞓吓覺突然間叫婆婆，然後就企起身好似'倒水'（諾諾自己形容）咁嘔，後來我地又發現佢有少少咳，今朝早除咗咳之外（又咳咗D痰出嚟），仲加埋流鼻，所以我地決定叫婆婆帶諾諾去睇醫生，希望佢睇完醫生（佢都好乖，冇扭計話唔去），食D藥，瞓番一覺之後可以好番D啦。

全職爸爸

因婆婆要返鄉下的原故，而媽媽又唔太方便請假，所以，我可以一嚐全職爸爸的滋味（星期一一日咁多啦）。

8:00am – 諾諾起身（佢一起身就叫我陪佢玩）
8:30am – 擦牙洗面
9:00am – 爸爸開始煮早餐（媽媽已預備好上海麵同水餃）
9:45am – 食完早餐洗碗（爸爸負責）
10:30am – 落街玩（踏單車+打網球）
11:30am – 返屋企休息
11:45am – 再同諾諾一齊落街買野預備午餐（買咗一盒白飯同兩隻雞翼，再加粟米汁，整粟米雞翼飯）
12:00pm – 開始煮野食（諾諾都有幫手，食完飯之後再食多個橙，我地兩個都好飽）
2:00pm – 食完飯之後休息咗半個鐘就去瞓晏覺
4:00pm – 起身，喺屋企Hea咗一陣
5:00pm – 帶齊裝備落街接媽媽放工（單車+網球）（媽媽買咗下午茶俾我地食，諗住食完就開始玩，點知一食完就見到婆婆同公公返到嚟，諾諾見到佢地，就話要同佢地一齊返屋企，玩都冇玩過）
5:30pm – 全職爸爸放工

其實開頭都有少少緊張，因為除咗要睇住諾諾外，仲要照顧埋佢早午餐，好在有媽媽嘅遙控幫手，嗰兩餐都能順利過關（諾諾仲話我煮得好味添）。雖然過咗好似好平淡嘅一日，但係我都覺得好開心同好滿足，因為可以由朝到晚對住諾諾，而媽媽就不知幾羡慕我，今次相信媽媽都可以多少少了解我平日嘅心情。

咁樣打網球？



















唞唞先













新單車（不過未控制到）



















諾諾話要影爸爸踏單車