面試季節

上星期五，我請咗半日假，除咗陪諾諾返學之外，仲要同佢一齊去荃浸Interview（係諾諾人生第一次Interview）。喺嗰朝早，諾諾心情都算唔錯，同佢有講有笑，所謂好嘅開始係成功嘅一半，於是，我滿懷信心咁帶住諾諾出門口返學。

返學大致上都冇嘜問題，係開頭有少少黐我（唱歌跳舞同點名都冇反應，老師話之前幾日媽媽同婆婆湊返學都唔係咁），不過後來玩玩具時，就變番正常D，老師話帶佢去攞玩具玩佢都肯，後來我話要出班房佢都話OK。

放學後（等到10:20am），我地就即刻搭車落荃灣，喺去到荃浸之前，我都有同佢做定預工，叫諾諾要回答老師嘅問題，如果做得好，同老師傾完計後就可以食麵包超人餅餅同飲寶礦力，諾諾都答話好，我諗住都應該OK啩……。

因我地早咗少少，所以要等一等先有得In，到叫名嘅時候，我地要排隊入班房，本來係排第一，但一準備入班房時，佢行咗兩步就唔肯行，一路貼住牆，最後，我地係最後一個入班房。入到去，見到有兩個老師，一個講故事，而另一個就俾分，講故事個老師用一個米妮公仔，話想邀請D小朋友一齊開生日會，又想認識吓大家，於是就問吓叫嘜野名，邊個同你一齊嚟，米妮又想同你握握手。

見到頭幾個小朋友都肯答老師問題，我壓力就更大，到問到諾諾嘅時候，我擔心嘅情況終於出現咗，諾諾真係唔肯答老師嘅問題，仲側側地身咁坐，對眼冇望到老師，隻手仔仲不停咁掃張櫈背，又唔肯同米妮握手，總之，就係當老師冇到，之後老師就走咗去問第二個小朋友，最後，米妮邀請大家一齊唱生日歌，其他小朋友就起晒身，又唱又跳又拍手，諾諾當然又係坐咗喺度冇反應。

到第二部份，小朋友分開兩邊玩玩具，跟住個老師就會問家長一D關於小朋友嘅問題，又問吓點解揀佢地間學校。喺玩玩具嘅時候，諾諾又幾乖喎，叫佢執野就執野，要佢問人先可以攞人地D玩具佢又肯，最後又幫手Clean Up（不過唔知會唔會計分），都算係攞番個尾彩，不過相信幫助都唔係咁大（）。

In完之後，我同佢搭車返屋企，喺車上面，我都有俾諾諾食麵包超人餅餅同飲寶礦力，因為我覺得，雖然佢唔肯答老師問題（好在之前都有少少心理準備），但佢嘅表現都算唔錯（尤其是係玩玩具時），爸爸都算滿意，所以，有少少獎勵都好應該。

PS：琴日(12/11)收到荃浸封信，結果都係唔收。星期六(8/11)又有兩個Interview，情況都係差唔多，都係唔肯答老師問題，又或者係亂咁答，我同媽媽都諗，如果咁樣都有學校收，就真係神嘅安排喇，但係而家最重要，就係要懇切咁樣祈禱，希望神讓諾諾揾到一間會適嘅學校（或者係有一間肯收）啦！

（好似好長添）

自己坐埋一角

返學喇

大個仔嘅諾諾，終於要展開佢人生嘅另一個階段 – 返學，本來爸爸諗住辭咗工，可以有時間陪住諾諾行出佢咁重要嘅一步，但可惜事與願違。最後，俾媽媽有幸爭取（因為腳痛的關係請了病假，唔知好唔好彩）陪諾諾一齊踏出嚟一步嘅機會，真令人羨慕。

琴日第一日返學（仲有一個姊姊同諾諾一樣都係第一日返），據媽媽所講，諾諾嘅表現都唔錯，除咗開頭要跟住媽媽同最初冇跟住老師唱歌做動作外，其餘大部時間都表現得唔錯，尤其是去遊戲室玩嘅時候，玩到不知幾開心（尤其喜愛玩過山車），不過最後因為時間關係，未玩晒已經要放學了（因得一個鐘）。

今日第二日返學，諾諾都好開心，老師仲話諾諾乖所以送咗張大貼紙俾佢（原因係諾諾有跟老師唱歌同動作，所以就係乖喇，咁我就問媽媽係唔係因為諾諾新咋，媽媽就話唔係，因為成班小朋友得諾諾一個有跟老師做，而其他小朋友就唔知去咗邊）。

根據學校嘅安排，頭一個星期家長可以陪小朋友一齊上堂，而且時間得一個鐘，老師亦會特別關照新同學，所以相信唔會有大問題。但係一個星期之後就唔知點喇，佢又要自己上堂，上堂又變返三個鐘，又冇爸爸媽媽陪，仲有要自己坐校車，相信對諾諾嚟講都係一個幾大嘅挑戰！諾諾，你要努力呀，無論點樣，爸爸媽媽都會無限量支持你嫁！

套校服幾靚（自己要擺Post）



















背囊Look



















返學Lu













上堂情況（媽媽偷影）