東尼仔的blog: 2008.07

禱告的學習

記得上次去黃金海岸玩沙沙，點知遇著落雨，諗住去唔成，好在我地有同諾諾一齊祈禱，最後都可以玩到沙沙。

喺剛過嘅星期日，又發生類似嘅情況。之前我地都預備好星期日方Sir屋企玩波波池同游水，喺返早堂時又落雨，今次仲加埋雷暴警告，都諗住未必游到水，不過我地都同諾諾講，我地返到屋企要祈禱，同神講希望太陽伯伯出嚟，咁我地就可以去游水。之後就同平時一樣去食早餐，跟住就坐白兔車返到屋企，點知一返到屋企，諾諾未坐定就話要祈禱，我真係諗到無諗過佢會咁上心，所以我都立即同佢一齊祈禱，祈禱就瞓晏覺等瞓醒之後出發。

可惜出發嘅時候，天氣都無好轉，所以我地就決定唔去游水，但都照入去方Sir度玩。而更可惜嘅就係，我地玩玩吓，見到開始好天，無落雨之餘仲有少少太陽，跟住就見到有D人去游水，喺嗰陣先知道原來自己的信心係得咁少，令到我地同諾諾少咗一經歷神嘅機會。不過今次都係一次好好的提醒，等我地知道神係有聴我地祈禱，仲會答應我地嘅祈求添。

第一次玩波波池

有得睇無得游

新髮型賀壽 - ToTo生日快樂

琴日媽媽終於帶咗諾諾去Sammi度剪頭髮，媽媽話今次諾諾好乖好合作，唔單止無喊，仲剪咗成二十分鐘都毫無怨言，我地俾足十個叻佢，之後就去當勞勞食雪糕同芝士包（魚柳包塊包同芝士），食完就返屋企洗白白。

另外，ToTo今日生日，諾諾今日未必能親身祝賀ToTo，所以特別錄咗一段短片，祝ToTo生日快樂。

http://www.youtube.com/watch?v=F5sIdJIOtfs

對白：ToTo生日快樂，快高長大，身體健康，阿們！

休閒假期

每逢假日，我地盡量都會安排一些活動，等我地同諾諾可以出去比較遠嘅玩吓，當然剛剛過咗嘅星期日同七一假期都唔例外。

喺星期日(29/6)，我地就相約咗阿正一家同ToTo去黃金海岸玩沙沙。點知一早，葵涌區就落住傾盆大雨，我地都唔知去唔去好，但最後都決定博一博。出發前，我地同諾諾一齊祈禱，希望天父可以俾我地玩一陣沙沙，好開心，最後我地真係可以玩到沙沙（雖然落住微雨）。

到咗七一，我地又約咗小博一家、ToTo、滅青、伯伯（船長）同強哥一家，去灝景灣會所同強哥屋企玩，嗰日都玩得好開心，有得食又有得玩，最後仲有雪糕食，返屋企途中頂唔住瞓咗覺。

假期雖然過得好簡單，但能夠一家大細一齊玩，都經已好滿足。

（本來想上星期Post出嚟，最後搞到今日先有時間！）

去黃金海岸玩沙沙 (29/6)