唱作人

平時諾諾唱歌，大多數是我地唱前面（幾乎唱晒成首），諾諾唱最後的一兩個字。但突然間，佢自己作了一首歌，雖然成首歌唱來唱去都是得三個字，旋律也得簡單，但卻是我聽得最開心的一首歌（相信媽媽也會這樣認為）。

* 現附上歌詞 *

波波槍

作曲/填詞/主唱: 諾諾

波波槍 波波槍
波波槍 波波槍

波波槍 波波槍
波波槍 波波槍

http://www.youtube.com/watch?v=b322Csw4DGQ

爺爺，祝你生日快樂 -- 17/4/08













約咗媽媽一齊去Sammi度剪頭髮 -- 18/04/08













去荃灣公園玩（好熱）-- 20/04/08

一歲半（大個仔喇）

上個星期五(11/4/08)，諾諾度過咗佢嘅歲半生日。嗰日嘅上晝，我地幫諾諾約咗去健康院打針，聽公公婆婆講，諾諾去到健康院都冇嘜野，仲喺入面玩，但當佢一入到去醫生間房嘅時候，就開始唔係好開心，跟住就話要出去，又有少少扭計，可能佢認得間房嘅佈局啦，不過最後都順利完成（度高、磅重、打針同埋有D測試）。根據健康院嘅記錄，諾諾而家嘅體重，終於上番去50%條Curve度，不過身高就仍然係under咗，希望佢大個D會好D啦。

到咗夜晚，等我地放咗工，就同埋諾諾（仲有公公婆婆）去葵芳Pizza Hut食飯，而因為我地都覺得諾諾已經大個仔喇，所以喺飲食方面都開始放寬，除咗俾諾諾飲雜果賓治外，又俾Pizza佢食，而食意粉又冇用水洗過，都算唔話得卦。食完晚飯，跟住就返屋企，同佢玩多一陣，之後就讀聖經祈禱瞓覺，咁就當同佢慶祝咗佢嘅歲半生日。

第二日，我地Ho's family又約咗出去食Tea Buffet，今次同埋姨媽姨丈同舅父一齊，再為諾諾慶祝生日。今次唔知點解諾諾食得比較少野，主要都係食咗雪糕同啫喱糖，連平時鍾意食嘅粉粉同包包都冇嘜點食，不過，佢都玩得好開心，成日要去玩朱古力噴泉，又要幫手'筆筆筆'，總之就好唔得閒，都算係過咗一個開心嘅下午。

話咁快就過咗十八個月，雖然我地成日都仲覺得諾諾係一個BB，但係望真D，佢嘅外表同表現都已經唔再BB了，已經變成一個小男孩，而BB時代就將會變成回憶，雖然有少少唔捨得（因而家實在太開心同太好玩了），但亦對將要面對嘅新階段充滿期待。

All you can eat !! (Pizza Hut)













篤住粒綿花糖

星期日節目

諾諾未出世前，我地星期日通常都會安排一些節目，如去團友屋企玩、行街食飯等等等等（可能已經係好耐以前嘅事，唔記得太清楚）。但自從諾諾出現後，我地嘅生活就有了一些改變，除了要安排節目俾諾諾外，又要等佢瞓醒晏覺先出得街，一般都要起碼三點先可以出門口，搞到我地中午冇野好做，就唯有同佢一齊瞓晏覺啦（不過其實瞓吓晏覺都幾舒服）。

究竟我地星期日主要會有D嘜野節目呢？答案就係去公園玩。因為我地發覺，好多我地覺得好玩嘅野，諾諾都未必鍾意，有時更加會有D抗拒，而帶佢去公園玩（最好帶埋波波槍），佢就一定會好開心，所以我地就只好順應民意，滿足諾諾嘅訴求。

不過，相信除咗去公園外，諾諾亦好想去沙灘玩。琴晚食食吓飯，諾諾無端端話要玩沙沙，又話要淋花（上次同正正佢地去嘅時候有玩過），睇怕我地都要加快幫諾諾買泳衣（最好一件頭連上身）同埋買套堆沙玩具，免得有天氣好但冇好裝備。

同正正一齊去新場玩（30/3 荃灣廣場，正！）













公園 + 波波槍













星期日(6/4)返咗馬鞍山（馬鞍山公園）

特別的復活節假期

三月二十一日（星期五）
今日一早，公公同婆婆就出發返鄉下，我地就開始了四天沒有公公婆婆的日子。在假期的第一天，我地相約了正正一家及3 x Helpers到黃金海岸沙灘玩，今次是諾諾第二次（正正更是第一次）到沙灘，第一次是與團友到蝴蝶灣BBQ，順便落去沙灘度行行吹吹風，點知諾諾都話驚驚。不過今次就完全唔同晒，只係開頭有少少驚，熱身過後，佢仲可以除鞋喺沙灘度玩，仲玩得好開心添，真係有好大嘅進步。













三月二十二日（星期六）
CoCo姨姨嚟到諾諾屋企體驗生活，仲帶埋畫具同顏色，諾諾終於可以試吓油水彩畫喇，我地都希望佢大個都喜歡畫畫，感覺好似比較有內涵。



















三月二十三日（星期日）
今日Ronnie姨姨離開了我地，返到天父身邊了。到下晝，我地又約咗正正一家同2 x Helpers到先施姨姨屋企食晚飯。真要多謝先施姨姨嘅款待，未食飯前，已經有紅酒、生果同鹹柑桔。到了晚飯，又炒蜆啦，又紅酒燴牛尾啦，又有靚湯飲，可謂無微不至，最後，睇埋先施親自操刀嘅DVD先返屋企，真係十分之充實。除了CoCo姨姨外，連’滅青’都一齊體驗生活，點知夜晚瞓覺時，諾諾可能因為被嘈醒了而扭計，喊咗最少有45分鐘，唔知有冇嚇親兩位訪客呢？













三月二十四日（星期一）
今日冇嘜特別節目，都同平時放假一樣，起身就落街食早餐，跟住返屋企午睡。後來，姨媽約我地出去沙田食Tea，食完Tea之後，順道去Snoopy Town度玩吓，諾諾好似對D公仔冇嘜興趣，只係對條滑梯有興趣，好彩有姨丈喺度幫吓手，佢抱住諾諾上上落落都有十次八次，搞到姨丈成身大汗，真係辛苦晒。到夜晚，公公婆婆終於返來囉，完成咗四日特別嘅假期。