玩具圖書館

之前返Play Group，個Miss話我地可以帶D小朋友去吓香港中央圖書館嘅玩具圖書館玩吓，話嗰度有玩具玩，又有專人協助，都不失為一個好好學習嘅地方。於是我上星期打去預約，個電話都幾難打得通，不過，最後都俾我成功預約到星期日嘅時間（16/3 3:00pm-3:45pm）。

終於等到星期日，到下晝諾諾瞓完覺（唔知點解佢一點幾就起咗身，平時瞓到二點幾三點），我地就出發去玩具圖書館，去到都要三點有多，好在都未算好遲（如果再遲D就會俾D walk-in嘅人攞咗我地個位，咁我地就唔知點算好）。

圖書館度都有好多玩具，但諾諾好似唔係太大興趣，每樣野都係玩兩玩就走咗去，可能俾佢四圍行吓仲開心。好快，45分鐘就過去了，之後我地喺中央圖書館出面食埋Milk Milk就返屋企，諾諾回家途中又捱唔住瞓咗。

總結今次嘅活動，覺得如果要專誠去玩具圖書館玩，就真係唔係好值得，來回車程都要兩個幾三個鐘，但玩就玩得45分鐘，又唔係特別好玩。不過，如果去開香港區，去玩吓又無妨。

入面嘅情況













表情多多(回家途中)

Outing – 大埔海濱公園

今個星期日(9/3/08)，約咗成班團友去大埔海濱公園度郊遊（當然唔少得三個小B，可惜小博今次嚟唔到），又搞到好似野餐咁，真係好耐都未試過，原來咁樣都好好玩。

經過上次迪尼尼的經驗，今次我地就帶埋諾諾最鍾意嘅波波槍去，但真係估唔到，唔單止諾諾鍾意，連其他小朋友都好鍾意，當波波槍噴波波嘅時候，四週圍D小朋友都去晒過嚟一齊追、一齊跳（應該Sampson最感受到佢受歡迎嘅程度），可見波波槍有幾大嘅吸引力。

至於公園裏面嘅設施，諾諾主要都係玩’Sir’滑梯嗰Set野，而其他設施就真係冇乜玩過，有兩轉轉轉佢又驚驚唔敢玩，有D又唔係幾適合佢玩，不過，多得咁多位Uncle Auntie陪幾個小朋友玩，令到佢地玩得好開心，咁樣其實就已經非常足夠喇。

綜合幾次Outing嘅經驗，我地已經開始摸索到點樣可以令到諾諾玩得開心：
- 地方大少少，可以俾佢四圍走；
- 設施唔使太多，只要有多D野俾佢搞；
- 有波波槍；
- 玩玩吓又可以野食（今次有諾諾鍾意嘅士多啤梨、提子、麵包同粟米）；
- 最重要係有人同佢一齊玩（所以我地一班父母希望可以招募更多Uncle Auntie成為我地Outing活動嘅一份子）

唔知幾時會再有一大班團友Outing嘅機會呢？

玩吹波波幾開心













估吓邊個同諾諾玩



















食士多啤梨













後面就係諾諾驚驚嘅轉轉轉



















掟飛碟

迪尼尼一日遊

上星期一(25/2)，因媽媽有一日補假，所以我都請了一日假，同諾諾&婆婆（仲有CoCo、署長同Sampson）一齊去迪尼尼玩番日。因要午睡嘅關係，所以我地要到兩點幾先出發，好在車程都算順利，入到場都未夠三點，在門口會合了三位Uncle Auntie之後，就開始半日嘅旅程。（謝謝有位Uncle幫我地安排到免費入場）

當初期望諾諾會好開心，因為有米奇鼠啦，又有鴨鴨同巴斯光年等熟識的卡通人物，又可以在園內四圍走，但到最後，現實與期望都有好大的出入。

相信我地都要負上很大的責任，在安排上只諗住應該諾諾會鍾意，又覺得會適合佢玩，就同諾諾去玩，但原來，可能諾諾的要求係好簡單，並唔係我地諗得咁複雜。不過，都係一次好好的經驗，希望下次可以做好D啦。

當日行程：
1. 約2:20pm出發，去到未夠3:00pm
2. 在門口會合CoCo / 署長 / Sampson
3. 到美國小鎮大街Shopping（齋睇），但諾諾已經好開心
4. 在大街旁等巡遊
5. 3:30pm巡遊開始，諾諾成日話驚驚，可能音樂比較大聲同公仔好大個
6. 食Milk Milk
7. 睇完巡遊，行過小賣部，有個姐姐吹番梘泡，現得好開心
8. 跟住去咗PoohPooh歷險之旅，由頭到尾都唔開心，仲喊住出嚟（可能因為我地分開咗兩架車坐 – 我+媽媽+Sampson & CoCo+署長+婆婆）
9. 諗住帶諾諾玩旋轉木馬，最後搞到嘔奶收場（開頭我+媽媽+CoCo+諾諾去玩，婆婆在外圍等我地，但諾諾好似唔想同婆婆分開，所以我地將諾諾交俾婆婆，我地就繼續玩，但佢更加唔開心，我地一路玩，佢一路喊，仲越喊越大聲，我地見到不知幾心痛，但又唔落得嚟，最後等木馬停咗，我地即刻出去揾佢，過一陣就嘔奶）
10. 一齊去睇Golden Mickey，睇睇吓瞓咗，但瞓咗十分鐘左右就俾D音樂嘈醒咗
11. 其他人去睇3D電影，我同媽媽帶諾諾四圍行吓
12. 同諾諾去玩巴斯光年星際歷險，相信又係音樂太大聲同埋D燈閃得太犀利，所以又令到諾諾驚驚
13. Book咗6:45pm去Corner Café食晚飯，諾諾都好乖，冇扭計
14. 食完飯睇煙花（諾諾話嘈）
15. 之後就揸車返屋企，途中諾諾瞓咗覺

我同媽媽做咗個賽後檢討，覺得其實簡簡單單嘅帶諾諾去個大D嘅公園玩，相信諾諾已經會好開心（如果有波波槍就會更好）。另外，就係要俾諾諾有足夠嘅安全感，唔好再分開玩，咁就應該唔會再發生以上嘅情況。

玩繩都咁開心













吹番梘泡













PoohPooh歷險之旅（玩前&玩後）