開心！Easy啦

剛剛過去的星期日(20/1/08)，因為約咗一大班Uncle Auntie & BB食Tea Buffet，所以朝早就同平時一樣同諾諾一起返早堂，然後食早餐，之後就返屋企午睡，要唞足精神出街街玩。但係唔知係咪諾諾知道有街出，瞓咗個半鐘左右就醒咗，不過都好，因為今個星期舅父返咗嚟，就咁樣同我同舅父玩咗個幾鐘，如果唔係，諾諾都冇嘜時間同舅父玩，之後就同諾諾打扮吓出門口。

因為媽媽（& Coco姨姨 & 署長姨姨）要去荃灣扮靚靚，所以我地就約咗喺荃灣等，再一齊坐的士去尖沙咀，而我就當然要一個人帶住諾諾去荃灣找媽媽啦，當坐巴士落荃灣的途中，可能諾諾之前瞓少咗，坐坐吓車突然瞓著咗，到落車、上的士、再出到尖沙咀落車先至醒，不過佢可以補補鐘我都好開心。

跟住我地就去到間餐廳坐低食野，佢又食包包，又食啫喱糖，又玩朱古力噴泉，好似好高興咁，但係最叻嘅係諾諾坐咗個幾兩個鐘都冇扭計，所以令到爸爸媽媽都好開心。食完野，我地又去咗Shopping（因為減價嘛），諾諾喺商場度走嚟走去，又同姨姨玩，又去舖頭搞人啲野，玩到不知幾High，就咁樣又過咗個幾兩個鐘，過程都算順利，之後就相信因為太疲倦而瞓著咗。返到屋企之後同佢做埋其他指定動作（洗白白、食奶同瞓覺），就咁就過咗一日嘅假期。

我同媽媽臨瞓前，諗返今日嘅行程同經歷，都覺得諾諾好叻，又好乖，出街瞓咗覺，食咁耐野冇扭計，同爸爸媽媽Shopping又冇發脾氣，表現足足有十個叻。其實，原來只要諾諾開心，唔扭計，同冇發脾氣，我地就已經好開心同好滿足，所以，要開心真係好容易（不過唔開心可能仲容易）。

坐定定，食Buffet













陪爸爸媽媽Shopping