慘喇！破相喇！

案件就在早兩日發生，據目擊者提供的資料顯示，案發當日(19/12/2007)下午，事主照常在家中玩耍，但當他企在一包未開封的紙尿片上時，因興奮過度，一不留神，便跌在地上，咀唇流血，奇怪的事當時事主並沒有大哭，只叫了兩聲便繼續玩耍，故有關方面只將今次事件列作有人受傷案處理。 （見到諾諾咁樣都有D心痛，希望佢可以快D好番同埋無疤痕啦）

城門水塘

剛剛過咗嗰個星期日(16/12)，約咗Auntie Ronnie同Uncle JoJo食早餐，食食吓早餐，佢地話諗住晏少少上城門水塘行吓，最緊要係Uncle JoJo揸車上去，咁我同Ada就諗，反正諾諾又未去過，又未夠鐘食Milk Milk，同埋又有車車坐，跟埋去都好喎。

就咁樣我地就一齊上城門水塘，途中諾諾仲有時間瞓咗一覺。開頭佢都有D呆呆地，不過過咗一陣之後就好咗好多，又要地地啦，又要睇雀雀同龜龜啦，又見到好多好大隻嘅”汪汪”，都好開心，我地當然都開心啦。原來咁嘅時間上城門都好舒服，我地仲約咗話下次上嚟燒野食添，希望快D可以成行啦！

(可惜無帶相機，唯有用電話頂住先）

爸媽唔易做

星期日(2/12/07)帶諾諾落樓下遊樂場玩，佢又玩'Sir'滑梯，又玩轉轉轉，後來又玩這個玩意（唔知有嘜稱呼，大家請睇睇片），令到我地都筋疲力盡，尤其是玩這個遊戲，要舉起佢又要兩邊行，佢又玩到唔肯放手，都幾辛苦，不過無辦法，鬼叫佢鍾意咩。

http://hk.video.yahoo.com/video/video.html?id=399982&p=遊樂場