Studio

早兩日(20/11)，帶咗諾諾去影樓影D造型相，希望留住諾諾可愛嘅一面。

佢嗰日個晏覺瞓到兩點鐘左右，到三點鐘出門口，準時四點到影樓，在等埋位時食埋Milk Milk，個安排都唔錯。

一開始影嘅時候就簡單D，影D時裝同家庭照，跟住就影造型。之前都諗過佢會唔係咁鐘意影D造型相，點知真係畀我地估中咗，影咗一兩個之後就扭計唔肯影（蛋殼造型），搞咗一陣，好在到影個野人造型時，有個斧頭俾佢啄啄啄，咁佢先開心返，當然，啄完又再扭過啦。之後勉強影多兩三個造型，可能有D眼瞓啦，心情唔多好，個攝影師話唯有畀佢自己玩，自自然然咁影啦。到最後，佢見到D車車又話要玩，咁就俾佢玩啦，哈！反而佢又玩得好開心，仲有求必應，終於大功告成。

可能真係好眼瞓，走嘅時候一上車就瞓咗。我地後來諗，搵人幫諾諾影相，係唔係只係為咗自己想佢影，而冇諗過佢會唔鍾意呢！我地以後都要多D照顧番諾諾嘅感受，唔好（成日）迫佢做D佢唔鐘意做嘅野。

造型相就未有住，放住張BBQ相先，睇起上嚟諾諾已經好似變咗成個小朋友咁，唔多似BB Lu。

大得太快

又畀大家睇吓諾諾喺屋企嘅生活，有幾咁鬼馬，氹到我地不知幾開心。

不過時間過得真係太快喇，話咁快諾諾已經一歲有多，有時都會希望佢唔好大得咁快，可以多D時間同我地玩，又多D同我地喺埋一齊......。不過掉返轉頭諗，只要我地可以盡力做好爸爸媽媽嘅本份，令到諾諾好鍾意我地，咁就算佢大咗，都會想多D同我地一齊啦。我地要努力D先得！

http://hk.video.yahoo.com/video/video.html?id=383092

食丹丹

好多人都問我地，食丹丹嘅丹丹係嘜野嚟，以下段片，睇完大家都應該明白。

其實我地都係為佢好咋，想佢快D好番，見到佢喊成咁，我地都好心痛嫁。

http://hk.video.yahoo.com/video/video.html?id=373865

背囊．車車．生日會

星期六返團契，署長姨姨送咗份禮物畀諾諾，係一個好靚既Pooh Pooh背囊，D顏色好襯佢，睇嚟我地可以畀番D野佢幫手拎。（多謝署長姨姨）

到了星期日，我地一早帶埋諾諾返早堂（好似好耐冇返早堂），可能因為諾諾有D病病地，早堂有少少扭計，不過好在佢都瞓咗幾個字，瞓醒後就好咗好多。完咗早堂就同Auntie Brown、Auntie Ronnie同Uncle JoJo一齊食早餐，佢同大家玩得好開心，跟住Uncle JoJo仲載埋我地返屋企，辛苦晒！

小休之後，再換套新衫，就出發去博博嘅生日Party，諾諾都玩得好開心，仲表演埋掉垃圾（要多謝Miss Chan Chan借出佢嘅八達通袋仔<<更正：應該是數碼相機袋仔>>畀諾諾示範），可以話係盡興而返，之後再喺愉城行多一陣，就返屋企休息了。（食咗兩日丹丹加埋婆婆嘅湯水，到琴晚諾諾都未病好，仍有D鼻水同有兩聲咳，希望可以快D好番啦）

係唔係好襯我呢



















有順風車坐