越嚟越多野講

相信諾諾都係一個十分活潑好動既小朋友，基本上係會不停的講野，一係就周圍搞野，真係冇時停。

而家諾諾已經識講好多野（比起幾個月前），又係時候要記錄一吓：
1. 搣（真係會搣人）
2. 啄啄啄（手刀嗰隻）
3. Emily（一擲千金嗰個，唔係Emily ee）
4. Dup（攞鎚仔Dup人）
5. 排骨飯（去酒樓自己叫飯食）
6. 公公/婆婆/舅父/姨媽/姨丈......
7. 泡芙（旺旺泡芙）
8.葡萄適（鍾意睇佢個廣告）
9. 提子/蕉蕉（見到就要食）
10. BB（睇到有BB既野就好開心）
11. 鑊鑊（其實佢係叫自己諾諾）
又寫住咁多先

示範畀大家睇嘜野係啄啄啄（有時會啄人）

麥當勞生日會

琴日幫諾諾開咗個生日Party，情況非常之混亂，D麥當勞姐姐把聲又有D吵耳，又唔能夠好好招待大家，實在有些過意不去，希望大家見諒。

講番個生日會，能夠有咁多人一齊同諾諾慶祝生日，我地都好高興，而諾諾既表現都算唔錯，當大家一齊唱生日歌時，佢都笑得好開心，好似知道大家係唱畀佢聽咁。不過當麥當勞姐姐拉埋諾諾同其他小朋友一齊玩時，就唔多鍾意，可能佢未識玩啦，再大D應該會好D。

（諾諾上星期五打完針，姑娘話如果有副作用都要過五至十二日D先出嚟，希望諾諾冇事啦）

小諾諾，生日快樂

首先，諾諾叫我代佢多謝咁多位Uncle Auntie送畀佢既祝福，佢亦祝大家1212（我估係祝大家唔係第一就第二）

今日我地同諾諾開咗個小型生日會（是星期日的Rehearsal），佢都好似好開心，同大家分享吓生日會既片段

http://hk.video.yahoo.com/video/video.html?id=340581

諾諾識行喇(幾步咁多啦)

琴日發現，諾諾已經不知不覺間學識行了，雖然每次只行到三四步，但我地已經覺得佢好叻。同埋諾諾行得都好趣緻，見到佢行得咁Cutie，我地都好開心，遲D練好D再表演畀大家睇。

http://hk.video.yahoo.com/video/video.html?id=336268

本地兩天遊

終於到了期待已久的國慶假期了，諾諾又舊曆生日，所以一早就落街同公公婆婆飲茶，休息一陣之後就出發去集合地點。我地一大班人（當然包括三位大少啦，我們還帶了諾諾的新車同佢學行的手推車）浩浩蕩蕩由青衣起程，揸咗個幾鐘車先到酒店，去到酒店已經三點幾，跟住幾位大少又要開餐，要成四點幾先有第一個行程─游水。

真係估唔到，平時比較文靜既小博，一落到水就變成另一個人，坐住水泡走嚟走去，開心到不得了。而小正就一貫地平實地玩，至於諾諾，就比較失威了，一路玩一路驚，到最後都係驚。

其實，這兩天都冇乜行程，只係照顧幾位小朋友已經好唔得閑，好在有幾個熱心既Uncle Auntie，今次活動先能夠順利完成，真係要多謝佢地，希望下次再有類似活動時，這幾個Uncle Auntie可以再出手相助啦！

總括嚟講，今次都算係一個好好既體驗，係第一次同Ada（唔同公公婆婆一齊）帶諾諾出街過夜，整個過程都好開心。不過，個假期真係過得好快好快，未熱夠身就已經完咗，唯有等一下次機會啦。