培訓宿營 (13-14/5/2016)

諾諾今個學年參加了學校舉辦的"領袖培訓宿營"，是兩日一夜的宿營(13-14/5/2016)。在星期五晚，我們一家三口便跟著老師派的checklist，為他收拾行裝，很快，便將背囊塞滿了。

原來，今次是諾諾第一次自己出外宿營，他表示自己有點緊張，我們都很明白他的心情。不過，最不放心的應該是媽媽了，她就是怕諾諾會不懂得好好照顧自己，又怕他會冷親，又怕他被蚊咬......。她在今早一出門後，就已經開始掛住諾諾了，真不知道這兩天會怎樣過！

其實，今次是一個很好的機會，讓諾諾可以訓練一下他的獨立及自理能力，希望他能順利及享受這兩天的生活。

火星任務vs見習無限耆

在放重陽節假前的兩個星期，諾諾就問我哋假期可唔可以同佢睇火星任務，但因唔知到時落畫未，同埋其實媽媽想睇見習無限耆多啲，所以一直都冇應承佢。

到了假期前的星期日，我就問諾諾（其實想試下佢肯唔肯就我哋）
T：如果我哋睇見習無限耆期好唔好呀？
N：點解呀？唔係睇火星任務咩？
T：因為媽媽想睇見習無限耆多D，我哋就下佢好唔好？
N：咁好啦（咁順攤！見佢咁有孝心，點都要獎勵下佢，最後都係買咗火星任務）

星期一放工買完飛返到屋企，我同諾諾講（想再試下佢）
T：我買咗見習無限耆D飛喇
N：唔係睇火星任務咩？
T：乜你唔記得咗話就媽媽咩？
N：係喎，唔緊要啦
（都係好順攤，好似好樂意咁）

其實，我一直都怕諾諾因為家人太照顧佢，太就佢，會令佢變成一個唔為人設想嘅人，見到諾諾肯為媽媽放棄睇火星任務，我心裏面都覺得好感動，都算老懷安慰。

Sleepover

個幾星期前，係諾諾九歲生日，近幾年都冇為佢開生日會，最多也只係約幾個朋友一齊吃飯。

但今年生日，諾諾希望可以邀請朋友仔嚟我們屋企Sleepover，而佢啲朋友仔都好有義氣，一口答應參加呢個盛會。這晚節目非常豐富，吃完晚飯後就立即番屋企，一起玩Monopoly，一起打Wii，一起食雪糕，一起玩足球遊戲，又一起吹水講笑話，搞到半夜兩點幾先瞓覺。

到第二朝，本來諗住應該可以晏Ｄ起身啩，點知幾個小朋友（友仔）八點幾就起身，一起身就話要打Wii，玩完一輪，仲要番主日學，真係精力充沛（頂佢哋唔住）。

雖然Sleepover係好辛苦（對大人嚟講），但見到佢哋玩得咁開心 ，我哋辛苦啲都冇計啦，希望佢哋幾個可以快快樂樂咁一齊成長，大個咗都可以繼續做好朋友。

懂事的小孩

以下是今天早上爸爸和諾諾的對話：
（因諾諾食早餐快了，所以還有十分鐘才出門口）
諾：今日咁早，可唔可以玩一陣呀？
爸：可以，但係爸爸唔得閒同你玩喎，因為仲有好多嘢要執，你自己玩啦
諾：咁我同你一齊執吖
爸：唔使喇，你自己去玩啦
諾：我都要幫手嘛
爸：但係可能你會冇時間玩架喎
諾：唔緊要啦，我哋一齊執吖
（執完嘢後）
諾：好嘢，執完，可以玩Lu
爸：冇得玩喇，我哋夠鐘出門口喇
諾：（即刻走去揹書包出門口）（咁順攤）

他今天這樣的表現，令我感到有些驚訝，莫非，他真的變得懂事了！？

醒目仔

前天晚上，媽媽突然想食雪糕，但家裏只有雲呢拿味，這是她不太喜歡的口味。

第二天，媽媽想著爸爸會在放工後會買雪糕回來，可是事情卻沒有發生，媽媽也有些失望，在晚上，爸爸應承媽媽明天一定會買雪糕回家。

到了今天，爸爸放工途中收到囝囝的電話，囝囝因怕爸爸忘記買雪糕，而再令媽媽失望，所以打電話提醒爸爸（其實爸爸是記得的），最後，爸爸當然是買了一同種類的雪糕回來，再沒有令媽媽失望了。

相信囝囝這麼上心，除了不想令媽媽失望外，其實也是關心爸爸的安危，醒目囝囝，唔該哂！

我是小學生了！

由九月三日開學，到現在已經一個學期了，這個學期，諾諾經歷了很多新的體驗，第一次大息小息，第一次在學校吃午飯，當然還有第一次測驗和考試。

在開學前，我和媽媽都有點擔心諾諾會不適應小一生活，但現在的情況看來，他對小學的生活已經非常適應和投入了，我們也不用替他擔心。

做父母的，其實也要一些時間去適應這個轉變，每天放工回家，要跟進他的功課，如遇上默書測驗考試，還要和他一起溫習，時間實在不夠用，也好像沒有什麼休息的時間，現在過了一個學期，這些慢慢也開始適應了。

諾諾，你要繼續努力，爸爸媽媽一定會全力支持你的！！

冬季運動服

愛心蛋治

這是諾諾為我做的早餐(22/10)，蛋治內的蛋就是由他主理的，食起來份外甜美，好味 :ｐ